Littera d. episcopi Olomucensis pro denariis fumalibus exquirendis.

Johannes, Dei gracia episcopus Olomucensis, administrator in spiritualibus et temporalibus ecclesie et archiepiscopatus Pragensis, honorabilibus et discretis dominis vniuersis et singulis decanis et plebanis per diocesim Pragensem constitutis et signanter dominis decanis Glacensi, Brumouiensi, Zitauiensi, Jablonensi, Cadanensi, Cubitensi, Teplensi, Plznensi, Glathouiensi et Raconicensi ac aliis, ad quos presentes peruenerint, salutem in Domino et presentibus fidem adhibere indubiam. Credimus vos dominos prescriptos non latere, qualiter dudum sanctissimus in Christo pater et dominus, dominus Martinus, diuina prouidencia papa quintus, ex certis causis in litteris apostolicis expressis, que vobis sunt intimate et insinuate, nos ecclesie et archiepiscopatus Pragensis in spiritualibus et temporalibus constituit et ordinauit administratorem, mandans omnibus Christi fidelibus et subditis dicti archiepiscopatus Pragensis ad nos in omnibus habere respectum et nobis de iuribus eiusdem archiepiscopatus plene ab vniuersis responderi. Cum autem in certis negociis dicti archiepiscopatus Pragensis vrgente necessitate nos oporteat facere non modicas inpensas, deliberacione cum nonnullis dominis prelatis et canonicis dicte ecclesie Pragensis prehabita iura dicti archiepiscopatus Pragensis decreuimus exquirenda et exigenda iuxta nostram possibilitatem, et precipue denarios fumales a dominis decanis et plebanis ac aliis sedi apostolice et nobis obedientibus. Ad que facienda propter loci distanciam ac pericula et discrimina viarum per nos intendere non valentes, venerabiles viros dominos Johannem Cralouicz decanum et Johannem de Duba, canonicos pretacte ecclesie Pragensis, dicti archiepiscopatus Pragensis vicarios in spiritualibus generales per nos constitutos, de ipsorum legalitate et industria plurimum presumentes, dictorum iurium et denariorum fumalium in dicta diocesi Pragensi constituimus et ordinamus presentibus veros et legittimos collectores, mandantes vobis dominis supradictis, quatinus prenominatis dominis de dictis iuribus et denariis fumalibus plene et integre respondeatis et respondere curetis cum effectu. Damus enim tenore presencium antedictis domiuis Johanni Cralouicz et Johanni de Duba plenam facultatem, vos dominos decanos et plebanos per diocesim Pragensem antedictos et alias quascunque personas ecclesiasticas et seculares conpellendi ad soluendum dicta iura et denarios fumales per sentencias suspensionis, excommunicacionis, cessacionis a diuinis et interdicti et alias penas a sacris canonibus permissas *) et debita satisfaccione premissa premissis sentenciis innodatos absoluendi et penitencias pro modo culpe iniungendi salutares ac cessaciones a diuinis et interdicta relaxandi et tollendi. Ratas enim et gratas habebimus sentencias, quas prenominati domini vicarii contra rebelles et inobedientes protulerint ac racionabiliter promulgauerint et ipsas faciemus auctore Domino inviolabiliter obseruare sic, et quod soluentes prescripta iura et denarios fumales reddantur infuturum indempnes, prenominatis dominis Johanni Cralouicz et Johanni de Duba ambobus in solidum concedimus per presentes vos dominos prescriptos et alias personas ecclesiasticas et seculares, a quibus dicta iura et denarii fumales quocienscunque perceperint, quittandi, liberos et solutos dimittendi ac pactum de vlterius dicta iura et denarios fumales non petendo faciendi, quos eciam per dictos dominos Johannem Cralouicz et Johannem de Duba quittos et liberos dimissos nos ad maiorem cautelam quittamus et liberos dimittimus per presentes, decernentes presentes nostras litteras ad vnum annum dumtaxat valituras. Datum Chremsier a. D. M°CCCCXXVI°, die Jouis XIIII mensis Februarii nostro maiori sub sigillo.

*) „premissas“ in orig.