Nickel von Penzick doselbist gesessin den ersamen wolweysen et cetera der stad Zittaw et cetera. Meyn dynst zuvor, ersamen liben herrn! Also ir mir geschribin hot von der von Gorlitz wegen und ir mir iren brieff in euerm vorslossen gesand hot et cetera, des bethe ich euch sulchir gewald, dy sie mir nochschreybin, das ich der ungerne thun welde; und habe ys nicht gethon, wenn ys den euern wol wissentlich ist rathman und dem stadschreiber, dy ich selber undirricht habe, wie ys zwischen den von Gorlitz und mir sich vorlaufen hat. Ouch bethe ich euch, das ir vor mich bitende seit, gleich und recht zu geben und zu nemen, bey den von Gorlitz. Wenn ir und andir bedirwe lüthe süllit meyn mechtig seyn, ouch also sie mich heischen vor meynen gnedigisten herrn den keyser et cetera. Gegeben zum Pentzk am dinstage sande Annen.