Landmanne, burgermeister und ratmanne des landes und stat Gorlitz an Hanus von Polentzk. Unser fruntlichen dinste zuvor, gestrenger lieber er voyt und besünder günner! Als ir uns von herrn Wentsch wegin eueres schwogers geschreben und ouch sinen briff und antwort mehte gesant hat, das haben wir wol vornommen. Also habet ir unser meinunge, als wir uch denn am nehsten geschreben haben, ouch wol vorstanden: Wy das herr Thime vormals dorinne geteidinget und gereth hat, und die sachen zwischen im und uns uffgenommen bis an den edlen herrn Albrecht von Colditz unsern foyt; dorzu her uns vormocht hat, das wir uns dorzu gegebin, vor in zu kommen vorwilt und vorjot habin. Und das uns nu nicht hindir im las unserm amechtman füget noch glympfflich deucht zu vorwandeln. Hirumb so bitten wir uch mit besunderm fleisse, das ir euern swoger haldin und undirwisen wellet, das her is ouch doby lossen wolle, als is denn begriffen und blebin ist, und sich darobir sulcher fehde mit andern sinen helffern kein uns nicht nötige et cetera. Geben des suntages an der heilgen kindlin tag anno 1432.