Gestrengen, woltüchtigen, erbern, weisen, besunder günstige forderer und liebe herren! Wir thun euch zu wissen, das wir an dem nehesten sontage noch sente Jocoffs tage Juli 29 in keginwertikeit des hochgebornen fürsten und herrn ern Hannisen herzogen in Slesien und herrn zu dem Sagan zu dem Luban mit den gestrengen erbern und wolweysen mannen der land und stete Budissin, Sittaw et cetera off eyme tage gewest seynt kegen Gotsche Schoffe und seynen helffern. Die haben do eyne verhandelunge gethon von wegen solcher zwetracht, die do zwischen uns und Gotschen Schoff ist gelegen, des wir haben keyserliche konigliche, fürstliche brieffe, also von der strossen wegen, dy wir von recht haben zu weren. Dorobir her die unsern mit seinen helffern beschediget und gefangen hat, des wir doch von en unbesorget gewest seynt; und off dem tag bethinde woren, unser gefangen los zu lassen, das do nicht geschehen mochte. Und bothen, wenn die unsern von im ledig und loss worden, der sachen zu gehen vor dy manschafft der lande und stete der zwen fürstentume zu der Swydenitz und zum Jawer und vor manschafft und steten der Sechs land und stete Budissin, Sittaw, Luban, Lobaw und Camentz. Ob die sachen von en nicht entscheiden worden, do both wir vorbas zu bliben vor aller unser gnedigstem herrn, dem Romischen, Ungerischen, Behemischen konig. Das her alles mit seinen helffern sulche unser beschedigung bithunge von uns hat vorslohen. So bethe wir euch mit sunderlichem vleisse et cetera, das ir im und seinen helffern dorobir geruhet nicht bizulegen et cetera, und, ab is noth wurde sein, doran nicht wollen hindern et cetera. Geben 1425 am montage vor sente Peters tage. ― Ouch obir sulche bittunge, die wir gethon haben, an dem montage noch Jacobi unserer gevangen wir in gemanet haben.

Senatus Gorlicensis.