Ich Wilhalm Waldnar, hauptman ze der Ygla, bekenn, als ich dem hochgeboren fürsten herczog Albrechten, herczogen ze Österreich etc., meinem genadigen lieben herren yeczund hie ze der Ygla gesöldent hab hundert ainundsibenczick werleicher ze rossen auf ain halbs viertail jars, das sich angefengt hat am suntag vor sand Bartholomes tag und sich enden wïrdet am nachsten phincztag vor sand Kolmans tag, also ist aim yegleichen werleichen das halb viertail jars ze sold bechaiden funff guldein, das in sum bringet acht hundert funffundfunfczick guldein, also hat der vorgenante mein genädiger herr die vorgenanten söldne^ar irs solts gancz ausgericht und beczalt und sag in darumb genczleich quit, ledig und los. Mit urkund, geben ze der Ygla am suntag vor sand Bartholomes tag anno Domini etc. vicesimo tercio.