Noch Crists gebort ffierczenhundert ym drey und dreysigisten jare vor sente Michels tag komen ist vor Pasken, klosterffoyt czu Heinrichow, Hedwig, schefferinne czu Rewman, wolgesunt ires leybes und der vornunft und mit wolbedochtem mute unbetwungen hat vorreicht und uffgelossen Michel irem manne czwu huben erbes mit allen genissen czum Rewman gelegen und allis, waz sie doselbist hatte ader gewinnen wirt, es sey wegelich adir unwegelich, noch irem tode czu haben und czu besiczen gernelich unde domete czu thun unde czu lossen noch synin ffreyen willen, also das der genannte Michel irem sone Adam, der sich czu den hussen gehalden hat, alz man spricht, geben und richten sal czehen marg pfenninge czu seyme teyle, ab he wedir czu lande queme und ym das von rechtes wegen muchte gevolgen, des sint geczewg Hannus Bart und cleine Hannus czum Rewman, Hannus Hoffemann und Jacob Puchel, czum Newenhoffe gesessen.