Nicolaus Ylaw official zum Stolpen: ad senatui Gorlicensi. Min herr bischoff hat mich her heim geschickt mit etzlichen sime gesinde und pherden von Basil us dem heiligen concilio umb lichtunge wille siner zerunge et cetera. Mir entpholen uch zuvorkindigen nuwe zitunge derselbis. Der ist nu also gar wil et cetera. Das die hussen 12 tage ire artikil die sie meinen zuhalden, vor dem concilio uß schrifften lassen und dornoch an itzlichem tage besunder ire schrifft antwerten, mittils in das concilium. Und das dornoch das concilium durch vir doctores liß antwurt thun uff ire artikil. Und das die hussen am montag nach inuocauit wider anhuben zu reden schrifftlich uff unser antwort et cetera. Man vornimet doch das die gelerten leigin, die nicht phaffin sint, mercken das sie geirret habin, und ist hoffnunge eines guten enden. Man vorstehit ouch, das der bobist umb der venediger willen das concilium hatte wuld gein Bononia legen, und dor unsern herrn den könig entsetzen des Römischen richs, der kronen zu Behmen et cetera uff das die venediger das Römische rich behilden, als is etwan die Römer gehabt habin, und der konig von Polan die krone zu Behmen et cetera. Dorumb das heilige concilium eine sunderliche sessio gehabt, und offinberlichen ein decretum lassen lesin: Ab der bobist keinerlei orteil, entsetzunge adir ander process kette gethan adir würde thun, wider unsern konig Sigismunden, sine rich, fürsthum, herrschafft, land, stete, das die untüchtig sullin sin et cetera. Geschreben zum Stolpen am dinstage nach laetare.