Unser gebet zuvor, liben herrn und frunth! Als ir uns heut verschriben habt von der Hussen wegen, wie sy wider aufferczihen und fur Pernnaw herauss czihen wollen, lass wir euch wissen, das uns unser potschafft erst heind von Pehem komen ist, darnach als dy Sunn undergangen was, und sagt uns furbar, das sy umb Bischofs Teincz lign und haben den Marckt under dem Pfreymberg aussgebrant und vil vichs do genomen an dem perg, dochso hat man sy darob ser geschossen. Auch ist unser Hauptman stetz dynnen, Sind sy vor der Plann aufprochen, und derfur der icht trefflicher mer, das liss er uns wissen bey tag und nacht, und als ir uns nesten schribt, wir scholden die sach an unsern gnedigen herrn herzog Johannsen pringen, die ist vor achtagen an sein gnad komen, und uns haben die sein zugeschrieben, sy wollen iren fleyss thun in den sachen mit rettung, ab sein not thu. Derfur wir fur war, das sy do ausser czihen wolden, das wold wir euch wissen lassen pey tag und nacht. Des gelich gelaub wir euch auch. Geben zu Valkenberg des Sunabencz nach Divisionis apostolorum ain stund in die nacht anno et cetera XXVIIII°.