Unsere freuntliche dinst zuvor, erbaren, weisin hern, besundern liben freunde! Wir thun euch zu wissen, das wir von unserin merklichen und bestendigen freunden worhofticlichen an mere enden gewornet sein. Dieselben wornungen alle ubereyne treffen, wie das sich die argen vordampten keczer met backen und met anderer beretunge schicken, und meynen uns met 6 oder met 700 pferden gentzlichen zu berennen uff die rede, das unser landmanne und gebauren zu uns nicht komen mochten, und wellen ere waene und drawanten eynen tag hinder en lassen, uff das sie ungewornet vor uns komen mochten. Dorumb wir bethen euer weisheit met dinstlichem fleisse, er wellet uns eynen oder zwene buchsenmeister, doruff wir uns gewegen mochten, wenne der unser, als er selbst wol wisset, bey euch gelemet ist, das her uns wenig nutzze werden mochte, von stadan unvorzogenlichen senden, und ab er vornemen wordet, das sich die keczer zu uns kerten, eurn reisigen gezeuge eylende zu uns schicken, und keyn uns thut, als wir gen euch gethan habin, noch thun wellen und freuntlichen alle zeit vordinen. Auch vornemet er ichte von eurn spehen, das uns zu wornunge komen mochte, das lat uns uff unser gelt an alles saumen wissen, wenne wir vornemen, das eyn hauffe kome vor Hirssberg, der ander vor die Cratzze in das land, die uns belegen werden. Gebin under unser stat secret in die sancti Vincencii. Doch hoffe wir zu dem barmherzigen gote, ob sie sich villeichte des gefrustes trossten, sie sollen des nemen kleinen frommen und wol von uns geletzzet werden.

Burgermeister und ratmanne der stat Lewenberg.