Unsirn willigen dinst zuvor, liben herrn und libin frund! Wir habin irffarn, wir daz wir groblich und swerlich kein uch belogin unde beredit seyn, alzo daz wir der lande reubir und beschedigir sulden furdern, husin und hegin zum Zar unde nemelich dy Bresener, dy nu Witche Kotwicz gefangen habin. Bitte wir uch libin herrin, frund unde nockebor, doz off uns nicht zu gleubin, wen wir is nicht gethan haben und ungerne thun weldin, daz wir dy ader ander reubir landis beschedigir hauzin ader hegin ader keyne furderunge thun weldin wedir unsern gnedigin herrn den konig unde wedir euch unde dy euirn, unde weldin den landin allewege libir dynen zu tage unde zu nachte, wen daz wir solchin ungefug suldin thun kein unszerm gnedigen herrn dem konige unde seinen landin unde kein uch, wen alle unsir hoffenunge unde aller unsir trost alleyne zu gote und zu seynen gnadin stet. Und auch mogit ir selbir wol wissin unde merken, daz man dy login unde ander bosheit off uns lügit unde irdenckit ader irdencken mochte, daz man hulffe und rad zu unsern armen herrn von Hockinborn unde zu uns mochte gehabin, dy wir dach nicht gelossin mogin von dez rechtin wege unde von eren wegin, wen zy jo unsern rechten erb herrn seyn, wy man dy vor von erbe unde von gute von landin unde leuthen brocht hot mit betriclichkeit in trauin und in gutin globin, den zy glöbit han, daz auch allen wissentlich ist, nu welde man zy unde uns noch gerne umme leip unde ere unde gut brengin, daz wir dach hoffin zu gothe unde zu unserm gnedigin herrn dem konige, daz her sulche ungnade den langin weg nicht wirt vorhengin, dy do geschit an unsir hirschafft unde an uns armen lüthin von herzoge Hans und seyne zulegir ader wer sulche bosheit unde lögin off uns tichtit unde sagit. Unde bittin uch libin herrin, daz ir uns eynen tag dorzu wellit beschedin; wen wir dez wartin suldin, zo vorschribit uns daz in euirm briffe, zo welle wir dorzu reitin kein Görlicz ader in euir stete eyne, welche ir uns benemt sic wert in euerm briffe, und wellin uns der sachin rechtwertigen noch euirs selbis irkentnisse wi ir irkennt, daz wir uns rechtwertigin sullin mit rechte ader mit wissinschaft. Wenn wir daz denne gethan han, zo bitte wir euch libin herrn und frunde, daz wir ymmir um euch vordynen wellin, daz ir uns den segir unde lögener wellit sagen und offinbar machin, der uns zo lesterlich unde vorhertlich belogen unde beredit hat, dem wolle wir denn alle seyne lögin unde bosheit zu vor gebin, dy her kein den landen unde uns y gethan hat, unde wellin in aber wyndin vor uch unde nirgin andirswo mit munde unde mit hande, daz her lügit und gelogin hat alz eyn vorhert bozewicht von vatir unde mutir, wen her selbir der lande vorrethir is unde manch jar gewest ist unde seynis rechtin erbherrn. Gegebin zum Zär under Czaslaus ingesegil von Gebelczk unde under Hans Ruczhicz ingesegil, der wir alle Pribische man gebrüchin off deze zit, sunder ausgenomen dy Melhozin, Trappe unde Hawg.

Alle Pribische man senden den briff ausgenomen dy Melhozin, Trappe und Hawg.