Johannes von gotis gnaden herzog und hirre zum Sagan ad senatum Gorlicensem tantum: Als ir uns geschrebin habit als von wegin der von Hockinborn mit en einen tag zu haldin zu Görlitz et cetera, beten wir uch noch mit sampt den aus den 6 land und steten uns holffe und folge zu thun und das anzusehen, das wir mit den unseren off euer wort sullichen schaden entphangin habin. Wy das nu gewant sey, so wollen wir mit den von Hockinborn einen tag zu halden uch nicht vorsagin und den zu Görlitz umb euer willin et cetera also bescheidenlichen, das wir von den von Hockinborn mit den unsern unbeschediget bleiben, dieweyle wir off den tag reythin und dovon wedir heim kommen et cetera. Gegeben zum Sagan.