Landmanne, burgermeister und rathmanne des landes und stat Gorlitz den gestrengen und woltüchtigen Hansen von Gerisdorff, Benedicten von der Eybe und andern unsers gnade her des koniges mannen im lande zur Zittaw et cetera. Als ir denn wist und vornommen hat, das Fultschitz Hansen Lelaw, unsers bürgermeister vetter, gefangen hat, also thu wir uch zu wissen, das derselbe Fultschitz, Hannus Bischoffwerder, Gabriel Wolffgang und Pauwel Meideburg mit iren helffern irst am tage des hiligen creucis 14. September ire entzay brive uns gesant haben et cetera. Und so berürt der Fultschitz besunder in sinem brive, das her von Dachsen erfahren habe, das wir sein briff nicht haben; ob wir dess leuken, das wüste her nicht et cetera. Auch unser fründe uff dem nehsten tage zur Lobaw land und stete mündlich underricht haben, das Fultschitz alhie zu Gorlitz uss deme geleite ist gerithen, den ehegenanten Hannsen Lelaw gefangen hat und sich dess kein uns ny bewert hat, wenn wir des brives und ingesegils seiner entsaunge zu der zeit und vor ny gesehen haben, denn nu. Dorus ir ouch merken mogit, das uns ungütlich von im geschit et cetera. So bitten wir uch mit gantzem fleisse, das er em keine fürderunge noch hantlangen mit keinerley sachen nichten thut uns zu schaden et cetera. Und begeren ouch domete von uch zu wissen und zu vornemen, ab ir uns sulcher fehde kein im und sinen helffern helffin wellit und beistendig sein et cetera. Geben am dornstage noch des hiligen crüces tage exaltationis.