Johannes, Dei gracia episcopus Olomuc. administrator eccl. Prag. venerabilibus dd. Johanni Kralouicz decano et Johanconi, canonicis eccl. Prag. vicariis nostris in spiritualibus archiepiscopatus Prag. amicis nostris carissimis. – Venerabiles domini et amici carissimi. Honorabilis et religiosus d. Johannes dictus Polomecz, professus monasterii Porte Apostolorum, veniens ad nos exhibuit nobis instrumentum eleccionis sue in abbatem ibidem et asseruit, quod vos secundum eandem eleccionem dedistis sibi cridam. Hiis igitur auditis nos representauimus eum serenissimo principi domino nostro regi, qui in eundem consensit. Idcirco nos remittimus prefatum d. Johannem ad vos, ut eundem confirmetis auctoritate nostra in abbatem seruatis seruandis iuribus et consuetudinibus ab antiquo tentis, nisi impedimentum canonicum interueniret, ad quam confirmacionem et alia inpedimenta, si que interuenerunt in eleccione et obmissa sunt, auctoritate nostra suppleatis, quam vobis in hiis scriptis damus et conferimus, tanquam per nos expedirentur. Datum Bude dominica die ante Cathedram sancti Petri.