Johanus de Vrsinis, episcopus Sabinensis, Hugo de Cipro, episcopus Penestrinensis, Johannes tituli sancti Laurentii in Lucina Rothomagensis, Johannes tituli sancti Petri in Vincula sic et Johannes tituli sancti Sixti vulgariter nuncupati presbyteri, miseratione diuina sacrosancte Romane ecclesie cardinales, uniuersis et singulis Christi fidelibus presentes nostras literas inspecturis, salutem in domino sempiternam. Licet is, de cuius munere venit, ut sibi a suis fidelibus digne et laudabiliter serviatur, de habundacia sue pietatis, que merita supplicum excedit et vota bene seruientibus sibi multo maiora retribuat, quam ualeant promereri, nichilominus tamen desiderantes domino reddere populum acceptabilem et bonorum operum sectatorem, fideles ipsos ad complacendum ei quasi quibusdam allectivis muneribus indulgenciis videlicet et remissionibus inuitamus. Cum itaque, sicut accepimus, domus sancti spiritus in Noua Pilzena, ordinis fratrum predicatorum Pragensis diocesis, cum ecclesia et pertinenciis suis propter querarum turbines et alias calamitates, que partes illas diucius concusserunt per perfidos hussitas, hereticos, catholice fidei inimicos, in suis edificiis et structuris adeo desolate et destructe existent, quod nisi de oportune reparationis subsidio eisdem subueniatur, penitus corruent, illamque fratres inibi degentes deserere et diuinum cultum altissimo hactenus laudabiliter impensum negligere cogantur, nos episcopi, presbyteri, cardinales predicti cupientes, ut ecclesia ipsa congruis honoribus frequentetur et in suis ac dicte domus edificiis et structuris huiusmodi nec non calicibus, libris ceterisque ornamentis pro diuino cultu necessariis, quibus egere prospicitur, decenter reparetur atque conservetur, ut Christi fideles eo libentius ad illam ac reparationem et conseruationem huiusmodi manus promptius porrigant adiutrices, quo ex hoc ibidem dono celestis gratie uberius conspexerint se refectos, de omnipotentis dei misericordia et beatorum Petri et Pavli apostolorum, eius auctoritate confisi, omnibus vere penitentibus et confessis, qui in natiuitatis, circumcisionis, epiphanie, resurrectionis, ascensionis et corporis domini nostri Jesu Christi, penthecostes nec non in natiuitatis, annuntiationis, purificationis, et assumptionis beate Marie virginis et nativitatis sancti Johannis Baptiste, dictorum Petri et Pauli apostolorum ac sancte trinitatis et ipsius ecclesie dedicationis, sancte Dorothee virginis festiuitatibus et celebritate ac omnium sanctorum prefatam ecclesiam deuote uisitauerint annuatim et ad reparationem seu conseruationem huiusmodi manus adiutrices porrexerint, singulis videlicet festiuitatum et celebritatis, quilibet nostrum centum dies de iniunctis eis penitentiis misericorditer in domino relaxamus. In quorum omnium et singulorum fidem et testimonium presentes literas fieri fecimus nostrorum que sigillorum iussimus appensione communiri. Datum Rome in domibus nostrarum habitacionum sub anno a natiuitate domini millesimo quadringentesimo tricesimo secundo, indictione decima, die vero vicesima tercia mensis aprilis, pontificatus sanctissimi in Christo patris et domini nostri, domini Eugenii, diuina prouidentia pape IIII, anno secundo.