Unsern willigen fruntlichen dinst zuvor, ersamen und weysen herren, besundern lieben frunde! Wir senden euir weysheit abschrifte der edeln herrn von Michilsberg und herrn Hlawaczen von der Leypen brive abeschrifte, die uns beide heute noch den vier messen sint komen, die meynunge ir wol werdet vornemen. Und bethen euir ersamkeit dinstlichen mit ganzem fleysse, das ir dis ding in ernstir achtunge zu haben geruchet unsers gnedigsten herren des kunigs, landen und steten und uns allen zu gute, das wir uns also getreulichen doryn setzen, nochdem als is wol not ist, das wir den bozen leuthen mochten widersten mit gots hulffe. Und geruchet das den von Luban auch zu vorboten. Das wollen wir umb euir ersamkeit allezeit willig gerne vordienen. Geben am sunabende vor Bartholomei undir unserm stat secret.

Den ersamen und wolweysen burgermeistre unde ratmannen der stat Gorlicz, unsern besundern lieben frunden.

Burgermeister und ratmanne der stat Zittaw.