Des edelin herrn Ulrich von Bebirsteyn herrn zu Fredelant schriffte entschuldigunge: Nochdeme ich Ulrich von Bebirsteyn von meynem allirgnedigisten herrn dem keiser gescheidin bin und von seyn rethin, daz ich uff dessin tag zu Gorlicz seyn sulde und mich sulcher zusproche rechtfertigen, als mich denn dy kouffman vor meynem allirgnedigistin herrn und ouch vor seynen rethen geschuldigit haben, daz habe ich gewart und bin syn wartynde und nymant wil meyne rechtfertigunge uffnemen et cetera. Besundern alz herzug Hans zedil ausweisit, darynne her berurt, das der roub keyn dem Forste komen sey mit andern nochfolgenden worten et cetera, da spreche ich zu, daz is meyne bruder und mir unbewust sey und wedir rath, tath, gnyz noch fromen daran gehat haben, und sy domit ouch nicht geleit haben, also daz Lynze, derselben eyne, der daz gut hod helffen nemen, ouch bekant hod, zo denne meins herrn herzugen Heinrichs und des genanten Lynzen schriftlich bekentnisz auszweist und innehelt. Sunder also sy meyn man und borger eczliche berüren, dy sullen sich des ouch rechtvertigen, und wes sy sich nicht gerechtvertigin mogin, da wyl ich bey thun, alz ich billich sal. Und were noch ymant, der meyne und meyns bruder rechtvertigunge uffnemen welde, dy wollen wir noch gerne thun, und sal an mir noch an meym bruder noch an den unszern nicht broch seyn.