Hauptman, manschaft der fürstenthumb Schweidnitz und Jawor den edlen, gestrengen, woltuchtigen, ersamen und weisen hern Thymen von Colditz et cetera landmannen, burgermeistern und rathmannen des landes und der stat Gorlitz, unsern besundern gunstigen lieben fründen. Als uns edle edelkeit und liebe vorschriben habt umb hülffe wider die ketzer et cetera, tun wir edle liebe zu wissen, das wir tag nach nacht keine ruge habin von den kätzern. Othmachau, Nymptze, Weissenberg, Kotzkenstein, Ebirspach mitt andern iren helffern und possadken täglichen für unser stat sein und uns gruntlichen vorterben, so das wir unser vorstete, vorberg und mölen für en schutzen müssen, und haben dach von nymande keine hülffe noch roth. So ist uns in deser stunden botschafft kommen, als wir euch eine abschrift et cetera. So haben wir allen desen landen und steten ernstlichen geschriben und gebothen bey leybe und gutte uff zu sein et cetera. Eines solchen glauben wir euch auch wol, ab uns das noth würde sein, das ir uns auch mit euer macht zu hulffe wolt komen. Geben et cetera anno 1431 an sende Stephanstage.

Einschluss: Cuntze Beler off dem Schetzler ad senatum Hirspergensem. Ich thu euch zu wissen ernstlichen, das die samlunge der kätzer zu Behmen wollen ein teil auff die Zittaw und der ander hauffe, vorneme ich, die wöllen mit Wotyken vor euer stat nu in desen heiligen tagen unvorzogenlich. Und vor wore hierumb warne ich euch, das ir eur ding nach dem besten unseumelichen bestellet, wenn ich ungerne erfare euern schaden. Geben am sontage vor dem heilige cristtage.