Ich, Hanns Ratslaw von Budweis, bekenn offenleich mit dem brief und tun kunt allen lewten, dy nu in leben sein und hernach kunftig werden, das ich emphangen und ingenomen hab v. schock grosschen prager munszen, die Anna Peschlein, hawsfrau pey dem Spital, dem got genad mein liebe Mum, der got auch genedig sey, in irem geschefft besunderleich meinen czwain kinden Johanni und Suzanne geschafft und beschiden hat, von ainem auf das ander czugepuren, und ob got uber dieselben meine czway kind geput da got vor ensey, das dyse mit dem tod abgingen und sturben dan ich, so schullen dieselben v. schock auf mich geuallen nach Inhaltung und ausweisunge der vorgenanten meinen Mumen gescheft, das gehandelt und bewart ist, nach dem stat rechten und mit dem Ingesigel der Stat etc Budweis ist, aber das dy obgenanten meine czway kind oder ains, welchs das wer lebendig belib, und czu seinen Jarem zwain, das ygotwil an in baiden geschenen sol, so schol ich vorgenanter Hanns und wil dy obgemelten v. schock den obgeschriben meinen czwain kinden ausrichten und beczalen, als ich das zu recht tun sol. Mit urkund des briefs besigelten mit meinem aigen aufgedrukchten petschat, und darczu hab ich gepeten dy erben fursichtigen den Hannsen von Stradenicz und Oswalden von Reichenstain, paide mitpurgen und gesessen ze Budweys, das sy der sach auch geczeugen sein mit iren petschaten, dy sy an disen brief gedrukchet haben durch meiner vleissigen gepet willen, in und iren erben an schaden, darunder ich mich auch verpint und gelob stet zehalden und zevolfuren, das vorgeschriben stet etc. Geben zu Budweys am Montag nach unser frawen tag der schidung Anno domini etc. xxxiii^o.