Catherina von gots gnaden herczogynne zcu Sachsen und marcgraffynne zcu Miessen.

Liben getruwen. Wenne uns ware botschaffe komen ist und yczund y^e und y^e kommet von Awsk und Brux, daz die ketczer czu Behemen mit den Taborn von Merern und allir yrer macht die stete Bruxs und Awsk meynen zcu oberfallen und mit storme zcu benotigen, und yczund yre buchsen, bliden, leitern und anderem geczug geladen und einteil gein Belyn bracht haben, davon begern wir von uch mit ganczem ernstem fleisse, daz ir euwer schucczen, die uch unser liber herre zcu folge zcugeschreben hat, was ir der noch der czal nicht zcu Behemen hettet, von stundan ußrichtet und bestellet, daz die uf dissen nehesten fritag uf den aband in die Celle kommen lasset und nach unsers voites von Miessen anwisunge halden, und last daz in keinenwieß, wenne unserm hern und synen landen grosse macht daran gelegen syn; dar an tut ir uns wol zcudangke. Gegeben zcu Coldicz am mittewochen nach jubilate anno et cetera XXVI^to.

Ouch wie wol uch unser liber herre nehest achczen schutczen zcugesagt hat, und meynete, dar an eyne genuge zcuhaben, so last uch nicht swer sien und richtet uch dye oberygen schutczen awß, daran tut ir uns zcu dangk. Gegeben ut supra.

Dem rate zcu Lipczk, unsern liben getruwen.