Uns ist zu wissen getan, wie das der edl unser lieber freunt Ulreich von Rosenberg den markt Haslach mit seiner zuegehörung verchaufn well oder hab verchauft. Wer dem also, emphelhn wir dir ernstleich, das du dann denselbn chauf uns und unserm gotshaus haldest umb solich gelt, als dann der chauf gemacht sol werdn oder gemacht ist, wann wir sein recht habn nach dem und der obgenant markt von uns lehn ist und ist auch von seinn vodern selign mit chauf von unserm gotshaus hindann pracht wordn; darzue habn wir auch brief von seinn vodern, wie es darumb gestalt sol sein. Und hietest du aber dizmals soleich gelt nicht berait, das verchủnd uns, so wellen wir dir es dann darnach fuederleich schiken, das zu bezalen. Gebn zu Regnspurg am suntag Jubilate anno et cetera XXI^mo.