Albrecht von Gottes gnaden herczog ze Osterreich und marckgraf ze Merhern etc.

Erbern weisen und getrewn lieben. Alß ir uns yecz habt verschriben von des abts von Pruckg, des probst auf Sant Pöltenberg, der abtissinn ze Oßlaw und von irer lewt wegen, das haben wir woll vernommen und lassen ew wißen, daß wir unserm getrewen lieben Jörgen dem Ruckhendorff, unserm hauptman zu Znoym, empholhen haben, mit in von der sachen wegen ze reden und sy zu underweisen, daz si sich mit ew halten, und haben im auch unser offen brief an sy gegeben, alß er ew des wol wirdet underweisen. Denn als ir uns schreibt von der losung wegen, die ir uns zu sand Michels tag nachstvergangen solt ausgericht haben und begeret ew die nachzelaßen, ist ew wol wißentleich, daz wir yetz vil ze schaffen haben und groß darlegen tun, durch des lands gemains nuczs und ewrn willen, dadurch wir des und andrer unsrer zinse zumal woll bedurffend sein. Davon bitten wir ew mit vleiß, das ir uns das in arg nicht merket, daz wir ew zu diesem mal solich nachlassen nicht tun, wan wir das hinfur in ander weg genedicleich gen ew wellen erkennen. Geben zu Brunn an suntag vor sand Barbaren tag anno etc. vicesimo quarto.

Dominus dux in consilio.