Wir Albrecht von gotes gnaden herczog ze Österreich, ze Steir, ze Keͣrnden und ze Krain, markgraf ze Meͣrhern und grave zu Tirol etc. bekennen, daz wir haben angesehn die dienst, die uns unser getrewr Czenkh von Mosnaw enther getan hat und hinfur tun sol, und haben im dadurch und von sundern gnaden das dorf zum Kreucz, das wir yecz innhaben und gen Orlowicz gehöret, mitsambt dem hof daselbs und mit den teyhen, wisen, holczern und mit allen andern zůgehorungen, so von alter her darczů gehört habent, gegeben haben und geben auch wissentleich mit dem brief in sölicher mass, daz er dasselb dorf mitsambt dem hof und andern zůgehörungen, als vor berürt ist, nu fürbazzer innhaben, nuczen und niessen mag uncz auf unser widerruffen. Und was er die zeit und er dasselb dorf also innhalt mit ainer gewissen auf das obgemelt gůt verpawet, das sullen wir oder unser nachkommen markgraven zu Meͣrhern im nach unserr ambtleut, die wir zu Meͣrhern haben, rat schaffen widerzugeben, wenn wir oder unser nachkommen dasselb dorf von im herwider haben wellen. Mit ůrkunt des briefs geben zu Laa an suntag nach sant Bartholomeus tag nach Kristi gepurde vierczehenhundert iar darnach in dem sechsundzwainczigisten iare.