Wir Sigmund von Gotes gnaden romischer kunig zu allen czeiten merer des reichs vnd czu Vngern, zu Behemen, Dalmacien, Croacien etc. kunig, bekennen vnd tun kunt offembar mit diesem briefe allen den, die in sehen adir horen, lesen, als wir durch merklicher sache vnd gebrechen, vnd auch groß notdurft willen eyn vngelt zu Breslaw vffczuheben von den ratmannen deselbis inczunnemen, vnd davon der stat schulde, vnd ander ire geschefte, domite wir sie vast swerlich beladen sin befunden haben vsczurichten nehiste geseczt vnd geordent, vnd auch gemaynet haben, wann dieselbe sie vsz iren schulden komen sij, das danne die vorgenanten ratmanne vns adir vnsern nachcomen kunigen zu Behemen zuwissen getan haben solten, vnd vas als danne wir adir dieselben vnser nachkommen sy mit dem vorgenanten vngelt tun geheissen hetten, das sy vns des gehorsam gewest sein solten. Als dann das in vnser kuniglichir maiestatbrief des sampstage vor sant Gregorien tag nehisten vorgangen dorobir gegeben clerlich begriffen ist, das wir also etliche tage wol geprufet haben, das beide gesten vnd burgen zu Breslow vast swer sein wurde, solt das vorgenante vngelt furbas alle wege vfgehebet vnd genomen werden vnd haben dorumme mit wolbedochtem mute vnd gutem rate geseczt, gemacht vnd geordent, seczen, machen vnd orden mit rechtir wissen in crafft dies briefes vnd kuniglicher macht zu Behemen, das das vorgenante vngelt weren vffgehebt vnd ingenomen werden sal, die weile wir leben vnd nicht lengir, vnd als balde wir von dieser werlde gescheiden sein, das denne dasselbe vngelt genczlich vnd gar abesein vnd nicht mer vfgehebet vnd genomen werden solle in keyneweis. Mit urkund dies briefes vorsigelt mit vnser kuniglichir maiestat ingesigel. Geben zu Breslow nach Crists geburt vierczenhundert jar, vnd dornach in dem czwenczigsten jare nehisten sampstags vor vnsir Frawntage Anuncciacionis vnser reiche des vngerischen etc. in dem dreivnddreissigsten vnd des romischen in dem czehenden jaren.