Noch Cristi geburt 1434 des nehisten freitagis vor den heiligin phingisttagen haben wir, ich Hartunge von Clux ritter uff Schochaw gesessin, ich Heincze Kotwicz houptman zu Gorlicz, und wir burgermeister und rathmanne doselwist vorricht und entscheidin den ediln herrn Ulrich von Bebirsteyn herrn zu Ffredeland an eynem unde den gestrengin Gotsche Schoff uff dem Greiffinsteyne gesessin am andirn teile umbe sulchen nom und nedirloge, die zwischen en gescheen seyn, also das Gotsche Schoff herrn Ulriche von Bebirsteyn seyn und der seyn habe unde pherd ungeferlich in sal wedir gebin, wes sie in derselbin nedirloge genommen hettin und noch ungeferlichin ynne habin, und dozu die gefangen ledig lossen. Ouch ist berurt, das der von Bebirsteyn von den von Lemberg und den von Bunczlaw nicht anders weis denne gutis. Desselbin gleich habin die von Lemberg und Bunczlaw ouch gesagit, dach also bescheidinlichin, sie hetten sich mit Gottschen und mit den zweien weigbilden Lemberg und Bunczlaw so geeynit und verbunden: ab ymandis dorein greiffin welde von eigener gewalt mit nome adir mit brande unverclagit uf die, der sie zu gleiche und rechte mechtig werin, das weldin sie helfin wedirn und steuern und also von dem von Bebirstein unbeteidiget bleibin, dach also: wurde is abir, das der von Bebirsteyn adir die synen ymandis us dem lande der zweier weigbilde und stete yn schulden meynen zu habin, den sullen sie vorfurn uff gelegeliche stete, sich umbe sulche broche lossen zuirkennen und thun so vil, als mogelichin ist. Wer abir ymandis yn der zweyer weigbilde eyme, der sein zu gleiche und rechte nicht welde lossin macht habin, den weldin sie ouch nicht helfen verteidigin. Des zu eynem bekentnicz habin wir obgeschrebin teidigisluthe Hartung von Clux, Heincze Kotwicz unsere ingesigele und wir burgermeister und rathmannen der stat Gorlicz secret an desin anlosbriff lossin drucken, der gegebin ist in dem jare und tage, also obin geschrebin steht.