Sigismundus, dei gracia Romanorum rex semper augustus ac Hungarie, Bohemie, Dalmacie, Croacie etc. rex. Notum facimus tenore presencium universis, quod ad nos miserunt fideles nostri dilecti cives de Pilzna, notificantes nobis, quomodo theloneum nostrum, quod in civitate Pilznensi de equis, pecoribus, plumis sive pennis et aliis rebus similibus recipi solet, et quod olim fidelis noster dilectus Johannes de Waldek, subcamerarius etc. vita functus, habuit et tenuit, per mortem suam ad nos sit realiter devolutum, supplicantes nobis, quatenus ipsis illud theloneum committere graciosius dignaremur. Nos itaque attendentes ipsorum fidelitatem et signanter, quod contra perfidos hereticos, non parcendo corporibus neque rebus, realiter se exponunt, eisdem civibus illud theloneum cum utilitatibus suis et iuribus universis tollendis, colligendis et in usus et commodum civitatis prefate convertendis commisimus et committimus presencium per tenorem, presentibus tamen usque ad revocacionem nostram tantummodo duraturis. Presencium sub nostri regalis sigilli appensione testimonio litterarum. Datum Posonii anno Domini millesimo quadringentesimo vicesimo nono, dominica proxima post festum nativitatis beate Marie virginis, regnorum nostrorum anno Hungarie etc. XLIII, Romanorum XIX et Boemie decimo.