Ich, Albrecht Strauss, und Magdalena, sein hausfraw, Peschl Frolicher tochter seligen, bekennen fur uns und all unser Erben und nachkomen, daz wir umb all zuspruch, die wir gehabt haben, zu den Eriben und fursichtigen Purgermaister, Richter, Rat und der ganczen gemain der Stat Budweis und den gescheftlewten von des guter wegen, etwan Peschl Frolicher und Elzbethen seiner hawsfrawen, darumb wir gestanden sein, also das es an uns solt sein gevallen, nu sein wir umb all staß und zuspruch gancz und gar vricht waren, mit dem Edeln herren Ruprecht von Polnheim, und den vesten Eriben Matheß Wischnye von Wetern und Peschik von Biela, die czeit hauptman der Stat Budweis, also beschaidenlich das die vorgenanten Purgermaister, Richter und Rat der Stat Budweis mit den gescheftleuten uns umb all zusprüch geben sollen fünf Schock grossen, die sy uns gancz und gar ausgericht haben und beczalten, in solher maß, daz wir vorgenanter Albrecht Strauss, Magdalena, sein hawsfraw, all unser Erben und nachkomen zu den vorgenanten Purger der Stat Budweis, die iecz und noch kunftig sind, khein zuspruch ewiklich, noch zu den gescheftleuten, nicht sollen haben in kheinerley weyß, und das geloben wir vorgenanter Albrecht Strauß, Magdalena, sein hausfraw, mit allen unsern Erben, was vorgemelt ist, stet zu halden pey unsern trewen und Eren mit vrkund. Aller sachen zu einer sicherhait hab ich, vorgenanter Albrecht Strauß, fur mich und mein vorgenante hausfraw und all unser Erben, mein Insigl auffgedruckt, und hab zu einer besser Sicherhait gepeten die Edeln herren, herren Ulrich von Rosenberg, herren Ruprecht von Polnheim, und die vesten Mathes Wischnye von Wettern und Peschik von der Biela, dieweil hauptman der Stat Budweis, die ir Insigl allen vorgenanten Sachen zu einer czeugnüss, In und Iren Erben anschaden, aufgedrukt haben czu disem brieue, der geben ist zu Crumpnaw nach Cristigepürd vierczehundert Jar und darnach in dem drey und dreissigisten Jare des phyncztag vor Stanislai.