An der Mitwoche vor Johannis Baptiste ist vor uns komen Peter Goltsmed, etwenn Hanns Newmeisters bruder von Prage, dem Got gnade, mit Bernhard Falkenawer vormunden des egenanten Hanns Newmeisters, und hat becant, das im Niclas von der Sweidnicz und Cuncze Eysenreich vormunden desselben obgenanten Hanns Newmeisters kinder die XXII schock groschen, die im sein bruder Hanns Newmeister vorgenant von seyme gute zu Prage zugeben benumet hat in seinem geschefftbriefe, durch unser bete und begerunge willen unschedlich dach des Newmeisters geschefftbriefen gancz und gar wol zudanke beczalet haben und dorczu alle andere schulde, die her im schuldig was bleben, keine usgenomen, das im wol genugte, und vorczeich sich doselbist aller ansprache und nochrede globende vor sich, seine erben und nochkomen, mit willen und wissen des egenanten Bernhard Falkenawers, dieselben vormunden, noch ouch die egenanten Hanns Newmeisters kinder noch ire geerben dorume furbasmë nymmer anzusprechen noch anczureden geistlich nach wertlich nach in keinerwise.

Eodem die ut supra haben Niclas Sweidnicz und Cuncze Eysenreich dem Bernhard Falkenawer vor uns und unsern rat nedirgelegit des Hanns Newmeisters, dem Got gnade, geschefftbrieff, der im und dem Erhard Vicztum lautet gen Prage, und den wolde der Falkenawer nicht von in ˂uffnemen˃ empfoen noch zu im nemen.