Meinen willigen dinst czuvor. Ersamen, weisen, lieben herren! Als ir mir schreibit und mich gebethin habit, euch wider czuschreiben, wie is umbe die thabern und weisen gewant sey, die do in dem lande czu Missin und Lausicz gewest sein, ap ich das wuste adir irfaren hette, thu ich euch czuwissen, das der pfaff Procop czeuhet uff den Berk zu den Kutten und wil von dannen die Basscen vor Leuchtenburg speisen mit dem vihe, das sie auss dem lande czu Missen und Lawsicz gebracht habin. Auch thu ich euch czuwissin, das die thabern und die weisen alle lantschafft und stete in deme lande uff diesen nehsten sente Niclas tage czu Prage sullen sein uff einem tage. Was ieh denne dornach irfaren würde, das wil ich euch wissin laszin ane seumen. Auch thu ich euch czuwissen, das der Jacubko mit seinem here kegin Luticz geczogin ist. Dorumb, so habit nu ewirs dingis wol in achte, als ich euch vormals geschriben, wenne, wo ich ewir bestes gewerbin mag und ewir ergistes czu widerwendin, das wil ich alczit williglichen gerne thun. Datum die sancte Elisabeth sub meo sigillo et cetera. Heinrich von Malticz, heuptmann czu Brux.

Auch lieben herren, als ir mir schreibit von des frids wegin, den wir mit dem Jacubken habin, euch wider czuschreiben, wie is dorumb sey, thu ich euch czuwissen, das uns der Jacubko denselbin fride uffgesagt hat an sente Mertins tage, und derselbe fride sal noch sten von denselbin sente Mertins tage obir vier wochin. Auch habin sich die pfaffen czu Prage sere geczweyt, also daß der pfaff Procop yczund kegin Prage czihen wirt umbe der pfaffen willen, das er sie mit einander berichten sal.