Mein stetin getruwen dinst alzeit williglichen bereit. Ich habe nest uwern burgermeister muntlichen wol auszgericht, mit welcher hinderlistiger gescheydikeit unser fynde dy ketzer durch iren reysigen gezug betrigelichen meynen erschleichen dese stete alhy im lande ader dy yn der Slesia et cetera. Als habin sy sich zu Prage nest im rathe des voreynet: Ists das en in Meissin würde wolgehen, so weldin sy denn alle stete in desin allen landen unsers gnedigsten herr des kuniges zwingen zu en zu tretin, mit en uff zu sein und mit en zu zyhen in andere cristen lande. Welche das nicht thun wurden, die welden sy gantz gründlichen vorterben et cetera. Ouch habin sy sich sunderlichen nu uff Meissin den zog also bereytit mit irer gantzen macht, das sy dyselbin lande wollen obirheupt twyngen mit störmen und mit streyten, adir sy musten zu irem glauben tretin et cetera. Sein ein teil nicht ferne von Brüx, Cadan, ein teil umb Hasenburg und beim Grawpen et cetera. Alle ire redelichste macht nicht wol uf 30000 sein werde; doch nicht wol die helffte streitbar volck sol sein. Haben noch kein grossen gezeug, weder büchsen et cetera, wenn allein 4 steinböchsen, der yede nahent einen centner swer scheust. Geschriben am sontage noch Lucie.

Die fursten zu Meissen bewerben sich in allen deutschen landen umb hulffe et cetera. An Thomas obende.