Unsern dinst zcuvor. Lieber howptman! Wir lasen uch wissen, das uns heimlichen eigentlichen ware bodschaft komen ist, das sich die keczczere sammen unde gewislichen her vor uns willen haben vor Awsk, unde die von Lutenbricz sullen ye uff dissen nehsten fritag zcu velde rucken mit here. Hir umbe, lieber howptman, duncket uns wol geraten sien, das ir uns ane sumen er ye besser stercket mit hoveluten unde fuß schutczen; so ir aller sterckest kunnet, wenn das wol not hirinne ist, unde besorgen uns, wo sy uns also unde di stad ane lute ummelegen, davon min gnediger herre unde die von sinen wegen hinne legen unde die stad grosen schaden dar ober möchte nemen, wenn ir wol wisset, das die stad mit so vel luten nicht zcubehaldene ist. Auch haben die ketczer das geschrei gein Merern gemacht umbe des willen, das wir uns nicht besorgen sullen. Hirumbe sumet nicht. Gegeben under Caspar Rechenbergs ingesigel feria II post dominicam circumdederunt.

Ditterich Pack, Caspar Rechenberg, unsers gnedigen herni amptlute.