Post humillimam sui recommendationem, reverende mi pater et præceptor! Quia socius meus carissimus satis late super occurrentibus novellis una mecum per aliam scribit literam: idcirco hic pauca aut nulla fere addenda videntur. Nam pridie ad nos vestris cum literis ambasiator venit Nurembergam præsentium bajulus, quem tunc retinuimus, ne recederet, quia nulla pro tunc nova habuimus, quæ vobis non pandiderimus prius. Heri de dei gratia venit a Praga per Egram nuntius, quem post Dominicam Oculi de consilio principum ad præfatas civitates misimus, attulitque bona nova a Pragensibus, qui ad dietam Quasimodogeniti venire promittunt in Egram, prout in copiis videbitis. Verum quia maxime expedit, marchionem Brandenburgensem venire nobiscum in Egram, licet idem prius annuisse videatur, tamen cras ambo ad eum nos transferimus cum sacri generalis concilii, domini regis et Bohemorum literis, petituri, ut ad dietam nobiscum veniat. De duce Johanne et mittendis per civitatem Nurembergensem non ambigimus: cras mane tamen de eisdem assecurabimur. Item noveritis, quod nuntius, qui a Praga nobis heri venit, mihi dixit, quod si ad duos dies tardius cum nostris literis Pragam venisset, jam Pragenses volebant paratis literis et nuntio ad nos misisse literas excusatorias, quomodo eorum culpa non, sed nostra videretur, si dieta in Egram petita non servaretur. Bene tamen steterunt contenti, visis nostris literis. Item retulit idem noster nuntius, quomodo Taboritæ quidam conditionis miserabilis et Orphani, qui gladium, famem et pestem transacta hyeme evaserint, nuper Slesiam revaserunt, et inopinate villulam quamdam obtinuerunt; et fertur, quod se transferunt versus Poloniam. Item dominus Herbipolensis ex una, et canonici omnes et singuli colligati civibus Herbipolensibus parte ex altera, valde male stant simul, et forte tam periculose vel periculosius, sicut steterunt cives Bambergenses cum clero Bambergensi. Dieta fuit nuperrime tenta ad componendum partes Herbipolenses: sed durissimis existentibus partibus, medium nullum reperiri potuit ad dirimendum tale malum. Item provincialis noster est circa nos, qui mihi commisit pecuniam ministrare sui ex parte pro contributione etc. Id faciam, cum Basileam rediero; alia nobis per vestram epistolam commissa pro viribus exequimur. Alia non occurrunt, nisi quod me vestris orationibus commendo et conventum nostrum vestræe discretioni. Peto etiam sincerrime recommendari reverendissimo domino nostro legato, dominis meis et patribus, priori Sambiacensi, tribus prioribus ordinis Carthusiensis et domino auditori. Datum ex Nuremberga, ipsa die Palmarum, anno XXXII. Item transmitto Vestræ Paternitati literas hic multas, nescio de qua parte mundi cuidam probo Nurembergensi missas; distribuere velitis, prout bene scitis.

Frater Johannes Nider ordinis Prædicatorum, Vestræe Paternitatis filius.