Unsern grus czuvor. Lieber getrewer! Als du uns geschriben hast et cetera das haben wir wol vernommen, und so du berürest und schreibest, du wöllest dein botschaft wider gen Prag tun et cetera, also begern wir, das du solichs ane seumen tust, und was du darinnen erferest, das lasz uns bey tag und bey nacht one alles seumen herab gen Boparten auf den Rein wissen, das wir uns darnach gerichten mügen, wann wir uns auf hewt gen Boparten zu unsern herrn und mitkurfürsten zu faren erhoben, und tu deinen fleisz dorinnen, als wir dir wol getrawen und mit fleis gern gen dir erkennen wöllen. Geben zu Aschaffenburg, am montag vor sant Bartholomes tag anno et cetera xxix°. Friedrich von gotes gnaden marggraue zu Brandenburg.