Neda de Kluk.

Nos Vitus dictus Consselik tunc magister civium, Maczko Sapiens, Johannes Kruz, Woyco Wratensky, Mathias Columbus, Petrus Thachowsky, Petrus sutor, Matheus balistifex, Johannes funifex, Mikess carnifex, et Niklas faber, consules iurati Albeaquenses regie civitatis, et Petrus dictus Lochowsky tunc iudex eiusdem civitatis, harum nostrarum vigore thabularum ad universorum noticiam tam presencium quam futurorum cupimus devenire: Quod constituta coram nobis personaliter honesta matrona Nedka de Kluk, olim Hodkonis, nobis in quatuor scampnis banito et in contestato iudicio, trium aliorum vigore habente, presentibus, sano corpore et animo, cum bona deliberacione dedit, exhibuit et resignavit, dat, exponit et resignat omnia bona sua et omne suum ius in Kluk villa, terciam partem ad eam iuste devolutam, Walentino dicto Heress, Wenceslao et Johanni filiis suis, quocunque nomine censeantur, videlicet curiam cum agris ac cum aliis omnibus mobilibus et inmobilibus; que inquam bona, videlicet tercia pars omnium et singulorum, post mortem Hodkonis coniugis eius ad eam legice devenerunt et sunt devoluta. Pueri vero utriusque sexus erant decem; ad quos due partes omnium bonorum pertinebant; quorum unusquisque porcionem ad ipsum quemlibet iuste et directe pertinentem pleniter tulit et suscepit. Prefata quoque Nedka mater ipsorum terciam partem tantum, ut prefertur, obtinuit; quam fillis suis memoratis inthabulavit, disposuit et ordinavit, ipsos omnino de isdem bonis potentes efficiendo. Hoc tamen adiuncto, quod dicti fratres et filii ipsius prescriptam Nedkam matrem suam debent et retinentur ad vite eius tempora benigne et decenter confovere, a primo ad ultimum, omnia necessaria eidem procurantes. Acta sunt hec anno domini millesimo CCCC°XX°, feria II in die sancte Agathe.