Ich Hanns Reybenicz bekenne offinlichen mit desem briefe allen, die in sehen, horen adir lesen, das mir die erbarn und weisen ratmanne der stat Breslow eyn gancz volkomen gnugen geton haben von des dritteteils wegen der gefangen der Thaborer, die bey dem weyne gefangen wurden, die den Neissern geborten, und ouch sust von aller gefangen wegin der Thaborer und ketczer bis doher, doran ich teil gehabt habe und mir geborten, mit namen uff meine fumff pferd, uff Boruths vir pferd und uff Nymptsch vier pferd, der ich mich ouch habe gemechtigt und begeben, und sust von aller gefangen wegin, doran ich bewtenteil hette mocht haben, keyns usgenomen, also das mir wol geniget, und globe vor mich meine erben und nachkomen, dieselben ratmanne und stat zu Breslaw, noch keinen derselben stat burger noch ynwoner von derselben gefangen wegen hernochmols nymmer anczulangen noch anczusprechen, geistlich noch wertlich, noch in keiner weise. Und des zu bekentnis habe ich vorgenanter Hanns Reybenicz mein ingesigel uff desen brieff gedruckt. Geschreben zu Breslaw an der mitwochen noch Katherine virginis. Anno domini millesimo CCCC^o XXXII^do.