Litera missa sacro concilio per dominum episcopum Constatniensem, ambassiatorem concilii in Boemiam, lecta in generali congregatione die Jovis quinta decembris anno et cetera XXXVII^o.

Sacrosanctae generali synodo Basiliensi in spiritu sancto legitime congregatae, universalem ecclesiam repraesentanti.

Dudum per literas meas sacratissimo coetui vestro sicut decuit notificavi successum continuum eorum, quae pro pace et salute huius inclyti regni inchoari et continuari decrevit sacrosancta vestra congregatio. Decet imo et res ipsa exigit, ut quae consequenter subsecuta sunt, eidem vestro sacratissimo coetui nota fiant. Sic igitur divina disponente clementia cura et sollicitudine maiestatis imperialis interveniente actum est: praeter ecclesias cathedralem et sanctis Apollinaris collegiatam ad XV monasteria sunt religiosi et religiosae restituti et restitutae, ipsis in monasteriis degentibus et deo servientibus, duobus demptis, in quibus propter indispositionem locorum non est habitatio religiosis conveniens. Disponuntur autem loca ipsa, ut commode qui in ipsis servire deo intendunt, habitare valeant in eisdem. In praedictis autem ecclesiis ritus universalis ecclesiae sicut decet observatur. Ad hanc civitatem data est libertas exulibus et aliis quibuscunque redeuntibus et venientibus standi et commorandi ad libitum; nihil ab eis exigetur, nisi quod decreta et ordinata per sacratissimum coetum vestrum observabunt. Nuper quaedam turbatio in hoc inclyto regno suscitari videbatur, quae divina dispositione, opera imperialis maiestatis, sibi assistentibus baronibus, militaribus et civitatibus ingressum sic non habuit; quid autem in posterum futurum sit, novit altissimus. Aliud autem non intelligo, nisi quod volunt compactata servare et ea in quibus vester sacratissimus coetus remansit cum suis ambassiatoribus observare et observari facere; sic enim promiserunt imperiali maiestati ad Hungariam proficiscenti, et post eius recessum in communi congregatione remanserunt. Hi sunt effectus, quos ex laboribus suis coetus vester sacratissimus reportavit. Concedat altissimus sua inclyta clementia, ut magis ac magis in hac et ceteris causis, propter quas congregatio vestra celeberrima agitur, augmentum et effectum landabilem suscipiat, ad dei gloriam, exaltationem fidei catholicae, pacem et unitatem ecclesiae die et Christi fidelium, ac sacratissimi coetus vestri laudem et gloriam in aevum duraturam. Datum Pragae, XIX novembris anno et cetera XXXVII^o.

Vestri coetus sacratissimi perhumilis orator Philibertus Constantiensis episcopus.