Wir Albrecht, von Gotes gnaden herczog ze Österreich, ze Steir, ze Keͣrnden und ze Krain, markgrave zu Meͣrhern und grave zu Tyrol etc., bekennen für uns und unser erben und tun kunt offentleich mit dem brief, daz wir und unser erben und nachkömen, markgraven zu Meͣrhern, dem edeln unserm lieben getrewn Janen von Leüchtenbůrg und vom Czornstain und seinen erben benennet haben wissentleich mit dem brief, ieͣrleich sechshundert guldein ze geben, die im zu ratgelt und zu behüttung und bewarung unsers gesloss, haws und stat Jeͣmpnicz süllen gevallen, und süllen wïr im und seinen erben dieselben sechshundert guldein alle jar beczaln zu den vier quatembern im jar, das ist zu yeder quatember hundert und fümfczig guldein mit der ersten beczalung zu der quatember in der nachstkünftigen vasten anczevahen. Und wenn wïr oder unser erben und markgraven ze Meͣrhern das egenant unser geslos, haws und stat ze Jeͣmpnicz von dem vorgenanten von Czornstain oder seinn erben losen, des wir nach lautt unsers saczbriefs gewalt haben ze tun, so sein wïr denn fürbazzer im und seinen erben die egenanten sechshundert guldein nicht phlichtig zu beczalen ungeveͣrleich. Mit ůrkunt des briefs, geben zu Wienn an samstag nach Unserr Lieben Frawn tag purificacionis nach Kristi gebürde vierczehenhundert jar, darnach in dem sechsunddreyssigisten jare.

D(ominus) d(ux) in (con)s(ilio).