Gotsche Schoff gesessen uff dem Greiffensteine ad senatum Golricensem: Als ir mir geschrebin habit als von wegen der von der Zittaw eine gůte mit en zu leiden zwischen hie und weynachten: dess kan ich nicht gethun, wenn sunder ich wil warten mit gotes hůlffe, ab ich mich an en gerechen mag.

Ouch, liben frůnde, thu ich euch zu wissen, das mich von euch wondert, das ir den krieg leidet von dem houptman von Schochaw und zwischen Dobschitze. Is wer vil bessier, welch teil unrecht wer und nichten folgete, das ir das selber undirstündet und hůlffet dem andern teile. Wenn ich euch enpiete, das Opatz von Tzirne und Hayn von Tzirne als heute dem houptman von Schochaw entsait haben, und dy haben bey en wol 1 ½ hundert pherde und welle dy kirche innemen zur Lesse. Und dowider sein leute, die do fynd sein ken der Sittaw und ouch eins teils eure landleute. Nu merkt hyrynne, festen sy dy kirche recht, was gutes euch und den landen doraus entstehen mag. Und wer besser, ir steuret dem houptmanne von Schochaw adir Debschitze, welch teil unrecht were et cetera. Gegeben uff dem Greiffensteine an der metewoche nach Francisci.