Burgermeister und ratman der stat Gorlitz dem gestrengen Deinhard von Panewitz zum Ugest gesessen. Deinhard von Panewitz zum Ugest gesessen! Als ir uns geschrebin habit, das haben wir wol vornommen, und besunder berurt von gelobde wegen, die der gestrenge Hanns von Polentz euch gethan habe et cetera. Und also vorneme wir in euerm brieffe nicht, das ir uns umb sulch gelde noch lute euer briffe indert eine ausrichtunge thun wellet et cetera. Hierumb so begern wir und manen uch noch, das ir uns nach angesichte deses brieffes ane vorder vorzihen haldit und eine uszrichtunge thut, wes wir euern brieff und ingesegel haben, wenn wir uch desz keinen tag furt mehr nicht gebin wellin. Ap ir des nichten thut, so wellen wir euch vort vorclagin und nachschreiben vor fürsten, herrn, rittern, knechten, reten der stete, burgern, gebuwern et cetera, das ir uns euer globde, brieffe und ingesigil treulos und erlos werdin wellet. Gebin zu Gorlitz am dinstage vor sand Marien Magdalenen tag.