Nos Iacobus abbas, Nicolaus prior, Wenczeslaus subprior, Augustinus plebanus in Montibus Chutnis, Paulus bursarius, Wenczeslaus confessor in Valle Virginum, Petrus Newburger, Iohannes Ochsl custos nomine et vice tocius conventus monasterii Czedlicensis cisterciensis ordinis Pragensis dyocesis tenore presencium recognoscimus universis, quod venerabilis in Cristo pater et dominus, dominus Vincencius, abbas Veteris Celle eiusdem ordinis cisterciensis, in arduis nostris necessitatibus sexaginta florenos Renenses nobis mutuo concessit, quos ab ipso integraliter recepimus et in usus proprios convertimus. Quam quidem pecunie summam pretactam promittimus bona nostra fide sine dolo in festo sancti Martini proxime instanti dare et solvere pecunia prompta et in parata dilacione et occasione qualibet procul mota. In casu vero, quo id facere negleximus, quod quidem absit, et prefatus dominus abbas ulterius pecunia predicta expectare nollet aut ipsius indigenciam haberet, extunc presentibus damus eidem plenam et omnimodam potestatem res nostras circa ipsum repositas obligandi iuxta sue discrecionis beneplacitum. In cuius rei testimonium sigilla nostra, abbatis videlicet et conventus premissorum, presentibus sunt appensa testimonio litterarum. Datum anno Domini millesimo quadringentesimo vicesimo sexto Sabbato ante festum sancti Iohannis Baptiste.