Wir Sigesmund von gotes gnoden Remischer konig, zu allen zeiten merer des reichs, unde konig zu Ungarn, zu Behem, Dalmacien, Crowacien konig, empiten den burgermeistern, rathmannen unde burgern gemeinlichen unserer stete zu Budessin, zu Gorlitz, zur Zitaw, zu Camencz, zu Lubaw, zu Luban unsern liben getrawen unsere gnode unde alles gut. Liben getrawen, wenne wir etliche widerwertige in der crone zu Behem wollen haben zu straffen unde auch nu bestellet haben wider sie zu zihen, dorumme gebiten wir euch ernstlichen mit diesem brife, das ir euir buchsen, was ir denne der grosten in euirn steten habet, offladen unde euch gonz derzu schicken sullet, wenne euch der edel Hlawoczs von der Leipen, euir houptman, enpiten wirt, das ir dann mit euirn gezeuge unde mit euirm folk bereit seit zu uns zu komen. Das ist uns wol von euch zu dank unde wollen das auch kein euch furbas gnediclich irkennen. Gegeben zu Breslaw am donnerstage noch dem suntage, als man in der heiligen kirchen reminiscere, unserer reiche des Hungerischen etc. in deme 23. jore und des Remischen in deme zehenden jore.