Wir Sigmund von gotes gnaden Römischer kůnig zu allen ezeiten merer des reichs und zu Hungern zu Beheym etc. kůnig embieten den burgermeystern reten und burgern gemaynlich der stat Straßburg unsern und des rychs lieben getrewen unser gnad und alles gut. lieben getrewen. wie mancherlay swere und grosse arbeyte koste und můe ůmb ußrewtung und verstörung willen der verbösten keczer und ungelaubigen, so leyder in unserm veterlichen erbe und kůnigrych zu Beheym bey unsern tagen gewachsen und ufferstanden sind teglich zunemen sich breiten und einreissen und sich gen dem almechtigen got seiner lieben muter alle heiligen die heiligen Römischen kirchen und uns iren natürlichen erbherren böslich uffleynen mit unglouben widerwertikeyt und boßheyt, wir zu vil zeiten und stunden getan und geliden haben biß uff disen hewtigen tag, das ist meniglichen wol wissenlichen, und wir meynen das ir das wol sůllet verstanden haben. und wann nů laider die obgenanten keczer so groblichen von tag zu tag zunemen und sich in umbgelegenen landen so treffenlich breyten und stercken und mit vergiessung kristenliches blutes mörden brennen und andern unmenschlichen dingen solich unfur treiben das nicht gar zu schreiben ist, darůmb so sind wir mit den erwirdigen und hochgebornen unsern lieben newen und öheymen des heiligen Römischen rychs kůrfůrsten und andern fůrsten und herren unsern lieben getrewen, die wir darůmb her gen Nůremberg besant und beschriben hatten, durch unser volmechtige und heymliche rete und sendeboten, mit namen den erwirdigen Johann bischof zu Agram canczler den wolgebornen Ludwigen graven zu Oetingen hoffmeyster und Houpten marschalk zu Bappenheym, die wir zu in ůmb unser kůniglichen person swerer und mercklicher kranckheyt willen damit wir yeczund beladen sein gesant hatten, eyns gemeynen anslages zu eynem teglichen kriege wider die obgenanten Behemischen keczer eynem yeglichen fůrsten prelaten graven herren und steten nach seinem vermůgen und gebůrnůße eyns worden und ůberkomen. daselbst unter andern euch uffgesaczt und angeslagen worden ist, das ir czehen spieße guter wol erczewgter lewte nemlich uff yeglichem spieß drew pferd und czwen gewappende zum mynnsten zu dem obgenanten teglichen kriege senden und schicken wöllet uff den suntag nach unser frawen tag assumptionis gen Kamb in Beyern unverczogenlich. darůmb so haissen erfordern und ermanen wir euch solicher trewe so ir dem almechtigen got und seinem cristenlichen glouben und auch uns und dem heiligen ryche schuldig und pflichtig seit und by unsern kůniglichen hulden, das ir on alles widersprechen und vercziehen, dem almechtigen got seiner lieben muter und allen heiligen zu lobe der heiligen cristenhait zu trost dem heiligen glouben zu sterckung uns und dem reiche zu eren und den obgenanten verbosten und verdampten keczern zu tilgung und ußrewttung, soliche obgenant czehen spieße und woltůgender lewte mit pferden und harnasch wol erczewgt auff den obgenanten suntag nach unser frawen tag nechstkunfftig gen Kamb zu andern, die dahin geschicket werden, zu eynem teglichen kriege da zu sein und ze ligen unverczogenlich schicken wöllet, und sie also ausrichtet demselben kriege ußczewarten und dem houbtman daselbst gehorsam ze sein und nicht von dannen ze schaiden on des houptmans laub wissen und willen, und das diß an euch keyn gebreste oder in solichem gotesdienste und der gemaynen cristenheit sachen keyn sawmnůße oder irrung sey. daran verdient ir lon von got, lob von den lewten, und wir wöllen das gen euch in allem gut gnedigklich bedencken. und wo das qweme das ir hyerinne sawmig oder lässig wördet und die obgenant anczal euch angeslagen nicht volbrechtet (des wir euch doch nicht getrawen), so möhte mäniclich wol versteen und mercken was andacht und ynnikeyt ir zu got und dem glouben und was trewen ir zu dem heiligen reiche trůget und hettet, und wir möchten nicht gelassen wir můsten und wölten das mit hilffe unser und des rychs kůrfůrsten fůrsten herrn und stete an euch straffen als sich das gebůret. und wann uns sůnderlich unser kůnigliche gemůte bewegt, und wir auch bedacht haben das eyn zemal grosse notdurfft were in disen sachen das alle kriege czwitracht und unwillen die czwischen unsern und des rychs kůrfůrsten fůrsten herren und steten erstanden sein oder vorhanden weren gancz hingelegt oder uffgeschoben wůrden, als wir das auch allen den obgenanten unsern und des reichs kůrfůrsten fůrsten hern und steten zu tun geboten haben: und desglychen so gebieten wir euch ernstlich und vestigklich mit disem briefe von der egenanten Römischer kůniglicher macht wegen, das ir alle czwitracht ob ir die zu yemand hett hinlegt, oder euch mit denselben in eynen gerawmen frid und stellunge zu glychen dingen seczet und zu keynrlay veintschafft noch vehde zucziehet, oder euch eyns glychen billichen rechten benůgen lasset, das solich hilff nicht gehindert und hinterstellig belibe. und uff das ir nů in disen sweren und nötlichen sachen die heiligen cristenheyt antreffenden unsern ynnigen ernst genczlichen versteen můget, und wir euch auch völlichen darynne ersuchen und ermanen, so haben wir unser kůnigliche majestat insigel zurucke uff disen briefe tun drücken. geben zu Nůremberg am montag vor sant Veits tag unser reiche des Hungerischen etc. in dem vierczigisten des Römischen in dem sechczehenden und des Behemischen in dem sechsten jaren.