Nos Wenceslaus, miseracione divina abbas monasterii in Wilemow, ordinis sancti Benedicti, Pragensis diocesis, tenore presencium pro nobis et successoribus nostris, ac conuentus nostri nomine recognoscimus uniuersis, quod cum nos egestate plurima pressi hiis malis persequucionum temporibus alio modo nobis succurrere non valentes, sane nichilominus deliberacione prehabita vendidimus et presentibus venditum tradimus clenodium nostrumet monasterii nostri, videlicet infulam seu mitram pontificalem de margaritis et aliis gemmis, laminibus aergenteis intextis, pro quadraginta quatuor florenis auri puri monete ungaricalis iusti et legalis ponderis venerabili in Christo patri domino Przibislao abbati monasterii Lucensis et suo conuentui Premonstratensis ordinis iusto vendicionis et empcionis titulo perpetuis temporibus possidentum. Quem quidem vendicionis et empcionis contractum venerabilis in Christo pater dominus Johannes, prepositus Cunicensis, inter nos equa lance ponderans ordinauit. Et quia dictus dominus Przibislaus suo et conuentus sui nomine prefatam summam quadraginta quatuor florenonum nobis dedit et actu integraliter iam persoluit, quam in usus nostros et dicti monasterii nostri conuertimus euidenter, ideo ipsum et conuentum suum de huiusmodi summa scripto presenti quittamus quittimque reddimus penitus et solutum. Horum in testimonium sigillum nostrum de certa nostra sciencia et voluntate presentibus est appensum. Petiuimus quoque venerabiles patres dominos Drzisislaum abbatem Siluensem, Johannem prepositum Cunicensem, irdinis Premonstratensis, unacum famoso Nicolao Bawer fratre nostro, ut eorum sigilla eciam presentibus appenderent, suprascriptis factis in testimonium et maioris roboris firmitatem, ipsis tam prelatis et eorum monasteriis ac Nicolao et heredibus eius absque dampno. Datum Brunne sabbato in die Sixti. Anno domini millesimo quadringentesimo tricesimo quinto.