Item anno domini 1437 4. feria ante Galli ist eyne richtunge gescheen vor der manschafft im lande zu Budissin unde den andern steten uff dem tage zur Lobaw zwischen den mannen hy im lande und desir stat Gorlicz umbe alle sache, broche und obirfarunge, wie die von denselben mannen gescheen ist, und ouch der ansproche, die sie weder zu der stat meynten zu habin, besundern von des wegin, das sich die manne hinder der stat wedir alde ordenunge an iren willin mit herrn Sigmunde von Tetschin und synen helfern geeynet und gefrid hattin, dieselben husten und hofeten, dovon der stat guter und dorffer zu vorterblichem groszem schaden komen sein, also das sulcher unwille und zweitracht gancz und gar hingelegit sein, das die manschafft by der stat sich furder mehr halden sullin gewenlichen, als ir veter und vorfarn getan habin, und sullin ouch der stat sicher sein von des wegin; und haben gelobit, das sie sich in der stat briffe und privilegia furder nicht legin wellin, derselbin gleich die stat wedir kein in thun sullin. Sunder die manne habin doselbist begert, daz man under in und iren brotesen fůrder nymandis sulde ufnemen in gefengnisze, man gebriffe sie denne uff hanthaftiger tat, daz hat man in nicht wellin zugebin. Ouch habin sie doselbist begert, das sie in der stat ouch vor andern luthen sicher weren, das hat man in nicht wellin zusagen denne vor den, die umbe der stat wille thun und loszin wellin und der man macht hette, sunder ab ymandis donoch brechin wurde, der stunde sein ebinteuer.