Albrecht, von Gotes gnaden herczog ze Osterreich und marggraf ze Merhern etc.

Erbern weisen und lieben getrewn! Als ïr uns yecz von des Franciscen wegen, unsers phlegër zu Olomuncz, verschriben habt, wie ir von sölicher klag, so auf in geen solt, nichts wisset ze sagen, und wie ir nicht kunnet derkennen, welicher uns under den zwain nüczer oder unnüczer sey etc., das haben wir wol verstanden und gevellt uns wol, seid ir solicher klag auf den egenanten Francisken nicht vernemet, daz ir in denn bey der egenanten unserr phleg lasset beleiben. Denn als ir uns schreibt von der geltschuld wegen, so unser getrewr Hassk von Waldstain den leüten zu ew schuldig beleibt, schreiben wïr im aber mit fleiss, daz er daran sey und gedenkh damit dieselben leut furderleich auzgericht und beczalt werden, denselben brief wïr ew hiemit senden. Wir schikhen ew auch hiemit ainen brief, den wir dem Perin Miclosch schreiben, begern wir an ew, daz ir im den an vercziehen bey ainem gewissen boten schikhet. Daran tůt ir uns ain sunder wolgevallen. Geben zu Laa an eritag nach sant Michels tag, anno etc. vicesimo sexto.

Dominus dux per consilium.

Den erbern weisen unsern lieben getrewn, dem burgermaister und dem rat ze Olomuncz.