Ich Ulreich Rudusch und ich Elsbeth sein eliche hausfrau bekennen fur uns, unser erben und nachkomen offenlich an disem brife vor allen den, die in sehen ader horen lesen: als von sulcher habe und guts wegen, so unser liber sweher und vater Jurge Kramer seliger gedechtnuß bey seinem lebendigen leybe zu den erbern, weisen dem rate der stat zu Brux geflohet und gefurt hat, nemlich vir tuch von Bruchsel ein entgencztes, item funff Mechlisch und czwey entgenczte, item acht Lötisch, item czehen Trawttner, item funff Nüremberger, item acht Echische und ein entgencztes, item ein Fulfurtisch, item der neuen varbe ein Englisch entgencztes, item ein grabes Newnhawser entgencztes, item ein silbrein gurtel und ein beslagne tasch mit einer silberein scheyde und ein krenczel und syben par hosen und ein silbrein schelel; umb sulche vorgeschribne und vorbenante habe und gut uns ein gancz außrichtung, kerung und benugen gescheen ist, daz wir in dancken und dorumb mit krafft dicz briefs bey usern guten waren treuen vesticlich geloben fur uns md alle unser erben und nachkomen, daz wir, noch nyemants von unsern von der obgenanten habe und guts wegen zcu den obgenanten dem rate der stat zu Brux, noch nymants der iren keinen zcuspruch, foderung, recht noch ansprach haben sullen noch wollen mit keinem rechten, es sey geistlich ader wertlich in keinerweys und verczeyhen uns auch des hinfür leuterlich gancz und gar on allerley geverd und argelist. Und des zu warer urkund und stetikeit hab ich obgenanter Ulrich Rudusch für mich, mein hausfrau und alle unser erben gehangen mein insigl an den brife und habe gebeten dy ersamen weysen Hannsen Kotenplaner mein liben ohem und Cristoffen Delniczer mein liben vettern, beide burger und des rats dy zeyt hy zu Eger, die ire insigel von meiner bete wegen czu geczeuknuß in on schaden und on entgelt haben gehangen auch an den brife. Der geben ist nach Cristi geburt vierczenhundert jar dornach in dem vierunddreissigisten jare, am montag nach oculi in der vasten.