Nos Johannes de Dubczan, decanus et capitulum ecclesie Olomucensis recognoscimus presentibus universis, quod bona Hulyn, que a domino Wenceslao, patriarcha Anthiocensi, perpetuo comendatario ecclesie Olomucensis, emimus iuxta tenorem literarum desuper confectarum, propter civitatis Chremsirensis contra hereticos tuicionem et conservacionem, que bona reverendissimus in Christo pater dominus Johannes, episcopus Olomucensis, cum nostro tenuit consensu, et adhuc ex speciali favore nostro eadem bona tenere debet propter dicte civitatis Chremsirensis defensum, quam ab illustri principe domino Alberto, duce Austrie et Marchione Moravie in certa et notabili summa pecuniarum exsoluit, a data presencium ad duos annos integros. Elapsis vero duobus annis predictis dicta bona Hulyn ad nos sine dolo et fraude deuoluantur. Si vero, quod absit, prefatum dominum Johannem episcopum infra duos annos predictos ab hac luce migrare contingeret, mox dicta bona ad nos, ut prefertur, sine contradiccione revertantur. In cuius rei testimonium sigillum capituli nostri minus presentibus est appensum. Datum Olomucz anno domini millesimo quadringentisimo vicesimo quinto, feria tertia infra octavas Pasce.