Nos Andreas iudex, Johanco, pro tunc magister ciuium, et Nicolaus Koranda, iurati consules et ciues ciuitatis Nowe Plzne, tenore presencium recognoscimus uniuersis et singulis testificantes, quod prouidus vir Nicolaus Pelhrzim sartor, noster conciuis, coram nobis ac pleno consilio personaliter constitutus, recognouit, se et suos heredes atque successores sue domus possessores, site in nostra ciuitate inter domos Wenceslai Pabiankonis ex una et Procopii institoris parte ex altera, in et super eadem domo et eius area ac in omnibus bonis suis, mobilibus et inmobilibus, habitis uel habendis, unam sexagenam grossorum bonorum pragensium census annui et perpetui pro decem sexagenis grossorum monete pretacte vero vendicionis titulo vendidisse sagacibus viris, Jacobo, notario ciuitatis nostre, et Procopio Fegal, commissariis famosi viri, Andree dicti Strhla de Prziewieticz. Quas quidem decem sexagenas grossorum racione testamentalis pecunie pro anima prefati Andree dicti Strhla delegatas recognouit, se pretactus Nicolaus Pelhrzim recepisse, quam quidem sexagenam grossorum antedictus Nicolaus Pelhrzim promisit bona fide sine quauis dolo malo et eius heredes et sucessores tenentur et debent prefatis Jacobo et Procopio, commissariis Andree dicti Strhla, singulis annis a data presencium continuis et perpetuis temporibus diuisim censuando soluere, videlicet incipiendo in proximo die sancti Georgii mediam sexagenam grossorum et in festo sancti Galli deinde proxime sequenti similiter mediam sexagenam grossorum sine quauis ulteriori dilacione. Quem tamen censum ipsi supradicti commissarii prefati Andree Strhla pro ipsius anima singulis annis et perpetuis temporibus diuisim, scilicet mediam sexagenam grossorum in festo sancti Georgii et mediam sexagenam grossorum in festo sancti Galli inter pauperes distribuere et diuidere debent et tenentur sine intermissione. Et non dato censu cuiuscunque dictorum terminorum termini quocunque anno, mox antedicti conmimisarus plenam habent et habere debent auctoritatem prefatem Nicolaum Pelhrzim, heredes et successores suos prenotate domus auxilio iudicis et iuratorum tunc temporis in nostra ciuitate existencium in iamdicta domo in aliisque bonis suis, ubicunque situatis et repertis, impignerandi et recepta pignera atque ipsam domum inter christianos siue iudeos obligandi uel vendendi et taliter non solutum censum ad plenum conquirendi sine omni iudicii strepitu et querele, hoc tamen expresso, quod si predictus Nicolaus Pelhrzim, aut eius heredes et successores in aliis certis et equiualentibus bonis cum consensu predictorum commisariorum unam sexagenam census perpetui pro decem sexagenis grossorum dictorum et non remissius comparauerit et more consueto confirmauit ex tunc ipse Nicolaus Pelhrzim, heredes et successores sui cum domo sua et aliis bonis suis a tali solucione census penitus liberi et soluti et qui hanc literam habuerit de voluntate prefatorum commissariorum, eidem competit ius omnium premissorum. In quorum euidens testimonium et robur valiturum sigilla nostra propria de certa nostra sciencia ad peticionem ipsis Nicolai Pelhrzim presentibus sunt appensa. Datum et actum anno domini millesimo quadringentesimo tricesimo tercio, in die sancti Anthonii.