Also ir wol vornomen hat, wie das Gottsche Schoff von Grifensteyn dy unsern unvorclaget gefangen hat, also euch lande und stete davon geschreben haben, wie das her das kegen en und uns unbewart gethan hat, wenne wir off der strossen in der Budissiner und unser wichtbilden gehalden haben, vorbotene ware off zu halden off recht, des wir keyserliche, konigliche und fürstliche brieffe haben, und gescheen ist us unseres gnade herr des königes lande in den Seschssteten. Und nue seine helffer usz euren wichtbilde entsait haben, dorumb das wir gleich und recht von im sulden vorslagen haben, das doch ny gescheen ist. Dorumme so bethin wir aber dyselben zu underweisen, das sie die fehde abethun wellen und Gotzschen anzuhalden und die gefangnen los und ledis zu geben, nach deme als euch land und stete vorgeschreben et cetera. Möchte wir donoch euir anewysunge nicht genissen und wir uns seynes und seyner helffer schützen müssen, bethe wir euch mit fleisse, das wedir euch nicht zu sein und glouben wir euch wol uns dorann nicht zu hindern et cetera et cetera.