Ich Hanns Wilswol bekenn, als ich in des hochgeborn fursten herczog Albrechts herczogen ze Österreich etc. meins genedigen herren dinst zu der Igla in seinem sold gelegen bin und daselbs etbevil sche^aden emphangen hab, daz mir derselb mein gene^adiger herr von der obgeschriben scheden wegen, die ich uncz auf heutigen tag genomen hab, wie die genant sein, ein gancz benügen getan und darumb erberleich ausgericht und beczalt hat ain sum gelts, daran mich wol benüget hat. Darum gelob ich, daz ich von der obgenanten schden wegen hincz dem obgeschriben meinem gene^adigen herren herczog Albrechten seinen lannden und lewten furbaser dhain zusprüch noch vordrung haben sol noch wil in dhainerlay weys an geve^ard. Mit urkund des briefs besigilten mit der edeln Hannsen des Gotesprunne^ar und Oswalts des Ingelstete^ar insigl, die ich des vleissikleich gebeten hab, daz sy ir insigl zu geczeugnuss der sachen auf den brief gedrukcht haben in und irn eriben an schaden, darunder ich mich verpind mit meinen trewn alles das ste^at ze halden, daz oben an dem brief geschriben stet. Der geben ist ze Wienn an mitichen nach Oculi in der vasten anno Domini etc. vicesimo tercio.

Dem hat man ausgerichtet LX guldein.