Sacrosancta et cetera. Venerabili patri, domino Heinrico abbati sancti Aegidii in Nuremberga, salutem et cetera. De religione ac fama ac zelo fidei, ceterisque virtutibus vestris, venerabilis pater, plenissime informati, placuit in re ardua fidei ac ecclesie catholice valde necessaria pro modico tempore uti persona vestra, prout religiosorum virorum nuntiorum et ambasiatorum nostrorum in Nuremberga apud vos existentium relatione scietis. Quare rogamus et obsecramus in visceribus Jesu Christi caritatem vestram, ut omnibus postpositis, etiam quantumcunque magnis et arduis, familiaribus et particularibus rebus, cum dictis ambasiatoribus nostris iter versus Egram arripiatis tempore opportuno, ad tractandum ibidem cum nuntiis Bohemorum, iuxta gratiam vobis a domino datam, ea que pacis sunt et reductionis ipsorum, ad laudem dei, fidei et ecclesie catholice exaltationem, huius sacri concilii, cuius vos ferventissimum zelatorem fide digna (relatione) percepimus, incrementum, necnon et vestrorum amplissimum cumulum meritorum. Ceterum de stabilitate et firmitate nostra ac sancto proposito, aliisque hanc sanctam synodum concernentibus prefati nuntii et ambasiatores nostri paternitatem vestram ad plenum informabunt, quibus in dicendis nostra pro parte fidem indubiam adhibete. Valete in domino, et in agendis nos et vos dignetur dirigere spiritus sanctus, huius sacri concilii gubernator et director, amen. Datum Basilee et cetera.